عفايس لشعرك

[ندعوك للتسجيل في المنتدى أو التعريف بنفسك لمعاينة هذه الصورة]

السلام عليكم ورحمة الله وبركآته ،’


في هاذ الموضوع ان شاء الله رح نحاول نطملكم كآمل المعلومات ولعفايس وليزاستوس الي يتعلقو بشعرنا ، وبيان سوغ الي عندها اي معلومة تفيدنا بيها خاطكش رانا كامل هنايا باش نفيدو ونستفادو باذن الله ،’



bon راح نبدى بالعفايس الاساسية
اول حاجة السيشوار الي مكاش دار ماتصيبيش فيها ع الاقل واحد ، مبصح كاين سيشوار من سيشوار على هذي رح نقولكم شوية عفايس تردوا بالكم منهم كي نكونوا ح تشروا السيشوار ديالكم :
1 لازم يكون القدرة ديالو تفوت 1800 وات يعني سخون باش اذا درتي بيه بروششينغ تخلصي بالخف وتان يشدلك بزاف.
2 لازم يكون بالايونات باش ماتصرالكش ليليكتريسيتي ستاتيك (باش تفيتي هذيك تاع الي بزاف يقولو كي نجبد شعري يتتكهرب).
3 لازم يكون ماركة معروفة كيما Babyliss . Braun . Philips .. الخ باش تضمني بلي حاجة مليحة ويبقى عندك اطول مدة ان شاء الله.
4 لازم تتأكدي من بلد الصنع مالازمش يكون صيني ، او مكتوب عليه made in PRC خاطكش هاذي معنتها الجمهورية الشعبية الصينية والبياع يحب يغلطنا ويقول بلي صنع اروبي.

شوفوا قبل السيشوار لازم كل واحدة تعرف نوع شعرها ، واي كان النوع لازم قبل مانغسلو شعرنا نديرولوا حمام زيت ، كيفاش؟؟
دوك نقوللكم ، لازم يا يا لالا قبل ماتغسلي شعرك تدهني فروة الشعر ديالك بزيت الزيتون (من المستحسن) واذا حبيتي اي زيت واحد اخر كيما تحبي المهم يكون مغذي ومليح ، مبصح حاولي تسخنيه شوية باش فروة الرأس تشربو بالخف ، وومبعداتيك غطي شعرك بالبوني تاع لبلاستيك وخليه ع الاقل 10 دقايق ، ومبعد اغسليه بالشامبوا الي يوالم شعرك
وهاذ الحمام تاع الزيت تعاودية مرة الى 3 مرات فـ الاسوع على حساب شعرك يعني اذا كان جاف 3 واذا عادي 2 والدهني خطرة واحدة.



ثانيا: كي تغسلي شعرك تقدري تديري الـبلسم ولا تستغناي عليه اذا كان شعرك دهني بزاف ، وممكن تستعملي ماسك للشعر ، وهذا كاين منو بزاف انواع من كل الماركات ولجميع انواع الشعر ، والمستحسن يكون من نفس ماركة الشامبوا ديالك،’

وهذي بعض الانواع لمليحة بزاف سورتو اذا كنتِ معولة تديري بروشينغ شعرك يخرج حريييير
[ندعوك للتسجيل في المنتدى أو التعريف بنفسك لمعاينة هذه الصورة]



ومتوفرين بكثرة فـ الاسواق ، واشنو اتأكدي من تاريخ انتهاء اللاحية وجبيه من محل موثوق ،’



وكي تكملي الماسك ديالك ، نشفي شعرك ولا ديريلو بروشينغ ولا واش حبيتي وماتنسايش تدهنيه بكاش كرام تاع شعر ولا سيروم باش مايتأثرش بحرارة السيشوار ويتقصف ،’





وضرك بعد ماهدرنا على طريقة العناية بالشعر والحفاظ عليه من اضرار السيشوار والحررارة ، رح نهدروا ع الليسور الي هو ثورة فعالم الشعر ماعليك غير تجوزيه على خصلة تاع الشعر مرة الى 3 مرات (على حساب الماركة ديالو وشدة الحرارة) حتى يخرج حرييير وكيما تاع الشرق آسياويات ،’
واشنو لازم تان نردو بالنا كي نكونوا ح نشروه ونخيرو ماركة مليحة خاصة Babyliss الي هي كيما سبق وقلتلكم الاحسن على الاطلاق لكل انواع الشعر هذا من جهة ومن جهة واحد اخرى لازم تخيرو واحد من أحدث الاصدارات علاخاطر هذوما تقدري تخدمي بيهم شعرك سوا كان ناشف ولا مشمخ ..




ودوك نروحوا ندرو شوية على الشعر كيرلي الي يتخدم بـ fer a friser ولا les bigoudis
ويختلفو فانو الاولى تمدلك نتيجة فورية ، والتانية لازم تصبري عليهم شوية او حتى اذا حبيتي باتي بيهم ، مبصح يتلاقاو في حاجة هي انو شعرك يخرج كيما كنتي حابة ،’



[ندعوك للتسجيل في المنتدى أو التعريف بنفسك لمعاينة هذه الصورة]

وتمدلك نتيجة تقريباً هكذا

[ندعوك للتسجيل في المنتدى أو التعريف بنفسك لمعاينة هذه الصورة]

اما Les bigoudis راهم متوفرين فـ جميع الاسواق وماشي غاليين بزاف وكاين منهم بزاف اححجام على حساب انتي كيفاش تحبي الخصل ديالك تكون

ورح يمدولك نتيجة مشابهة لهذي

[ندعوك للتسجيل في المنتدى أو التعريف بنفسك لمعاينة هذه الصورة]

وفـ الاخير حبيت نمدلكم بعض ليزاستوس والنصائح الي بيهم شعركم دايما يبقى هيلول:

اول حاجة مين داك الواحدة يكون شعرها متيري وانتيك مي كي تطول بيه شوية يتزيت ويولي يبان بلي ممشوط عندو بزاف ، ماشي هنا المشكل مي لبروبلام لوكان يجوك ضياف على غيلة وني في هذيك الحالة وماعندكش الوقت تغسليه وتعاوديه ، امالا نمدلك فكرة شابة واشنو غير يروحوو الضياف تروحي تجري تغسليه هههههه
الفكرة يا لبنات هي تحطي التالك تاع دراري الصغار ايوووه تاع الداراي الصغار مكلاه تخزروا فيا هكداك بنص عين هههههههه ، تحطيه ع الفروة ومبعد تجوزي بالمشطة وتتأكدي بلي هذيك لبيوضية راحت.



ونصائح اخرين ضروريين لكل واحدة:
ماتنسايش تنشفي شعرك مور الدوش خاصة فـ الشتا باش ماتمرضيش بصح واشنو مين داك كي يكون الجو شباب خليه ينشف وحدو بعد ماتمسحيه بالفوطة وتتلقيه خاطكش هاذ الشي مليح ليه مرة على مرة.

مااتنسايش تان تحميه من اشعة الشمس والحرارة خاطكش هوما العدو اللدود ديال الشعر.


ومرة على مرة استعلي شامبوا طبي كيما alphactif (يدير 650دج) وشريه من الفارماسي باش شعرك دايما يبقى صحي.

وآخر حآجة اهتمي بالغذاء ديالك خاطكش هو اللي يخلي شعرك دايما قوي ، والتغذية الداخلية اهم من الخارجية .







تم بحمد الله،’
وان شاء الله نتلاقاو عن قريب في موضوع واحد آخر على عفسة واحد اخرى ،’
وماتنساونيش من صالح الدعاء بارك الله فيكم ،’




الي عندها اي سؤال أو تعليق ولا معلومة جديدة تتفضل بيهم رانا هنايا كامل كيما قلنا باش نتعاونوا،’

الله يسلمك حنونة

شكرا لك ريحان نحب نسالك انا شعري يزيت بزاف يعني نغسلو اليوم غدوة بعض يزيت اذا كان عندك حل يا ريت تفديني

موضوع مميز بارك الله فيك

مشكورات عزيزاتي على المرور