ذنب من هذا...

السلام عليكم ورحمة الله وبركاته

كيف الاحوال انشاءالله كلو تمام

اليوم جبتلكم موضوع لفت انتباهي في اوساط الشباب وهذي القصة واقعية وصراتلي البارحة

كنت في الحرم الجامعي عندي حصة اعمال موجهة وهي حصة مخصصة للبحوث الاقتصادية يعني مجال دراستي

بدات الحصة وكان كل شيء عادي مجموعة من الشبان يلقو في البحث والاستاذ يستمع للالقاءوبقية الطلبة كل واحد واش كان يدير

ختكم كانت في عالم واحداخر معلبليش كامل واش كان صاري.......

المهم كانو يناقشو في بحث عن العولمة وانا لاادري كيف تطور الموضوع ووصل الى قضية عمل المراة

كي رديت بالي للكلام لي كانو يقولو فيه سمعت طالب قال للاستاذ بالحرف الواحد"يا شيخ انا ماشي مهبول نخلي المرا ديالي تخدم....."

الاستاذ ضحك ضحكة صفراء وقالو علاش متخليهاش تخدم

رد عليه الطالب وقالو ماكانش ثقة في النساء تع اليوم وانا اذا درت الكوراج وتزوجت منخليهاش تخرج كامل من الدار.....

ردت عليه طالبة وقاتلو هذي نيتك العاطلة خلاتك تشك بهذي الطريقة في النساء وكيما كاين المرا العيانة كاين مقابلها 10 نسا لاباس بيهم

وبنات فاميليا

الاستاذ باه يهدي الوضع غلق الباب وقال لهم اتناقشو بطريقة حضارية

الطالب قال يا شيخ رانا نشوفو في بنات اليوم كاسيات عاريات لا حشمة لا حياء صار التحجب والتعفف عندهم موضة قديمة وصار الخدع

واللعب بمشاعر الشباب هوايتهم

وانا نخاف ندي وحدة وننخدع فيها ونشقى عمري كامل

ردت الطالبة وقالت انتو لي علمتونا الخدع والنفاق ومافي متلاعب بالمشاعر من غيركم انتو لي توعدو الفتاة بالزواج والحياة السعيدة

وتروحو وتخلوها غارقة في احزانها ثم سكتت قليلا وقالت بصح وين الشباب لي رانا نتكلمو عليه اذا كان الواحد فيكم

مايهمو غير الجري وراء البنات والدردشة معاهم في التليفون والفايس بوك لا خدمة لا مستقبل واضافت انا كان نبقى عانس ومنديش

واحد من هذي النوعية

وتوالت الاتهامات من عند هاذا ومن عند هذي وانتهى وقت الحصة واحنى ماكملنا البحث ما تفاهمو ذنب من هذا

فالشاب يلوم الفتاة والفتاة تلوم الشاب


واش رايكم في هذا الموضوع لي صادفني اكثر من مرة في اوساط الشباب

اتمنى ان تعطرو موضوعي بردودكم وارائكم

شكرا حبيبتي على طرحك لهذا الموضوع,,, والله يا ريحانة ربي سبحانوا خلق وفرق كاين الإنسان الصالح وكاين السيئ كاين نساء ماشاء الله وكاين الله يستر يطيرو مع لحمام وكذالك بنسبة لرجال كاين لي على خلق وكاين لي مخاوي ثعالب وذيوبة,,, منقدروش نحط ذنب على النساء وحدهم أو على الرجال وحدهم وكيما نقولو بعامية كل واحد يخدم بأصلوا... شكرا مرة اخرى ريحانة المنتدى

اولا مشكورة على المداخلة عزيزتي جيجي

وانا راني معاك في الكلام لي قلتيه في كلا الجنسين كاين المليح والعيان رغم انو كثرة العيان ولاو الناس يشوفو في بعضاهم غير الحاجة لي ماشي مليحة هذا لاينفي وجود بنات فاميليا مستترات يعرفو ربي وشادين قدرهم في نفس الوقت كاين شباب لاباس بيهم مازالو يشوفو في المراة اختهم ويماهم لي لازم يحترموها
واذا تكلمنا على الفئة الاخرى رانا منكملوش الهدرة لانو بصراحة انتشرت في اوضاع مجتمعنا وهذا واقع لا يمكن الهروب منو

يعطيك الصحة على الكلام الجميل لي قلتيه
عندك الحق في كل كلمة
مشكورة على مرورك العطر

شكرا ريحانة على الطرح القيم وانا رايي من راي البنات

مشكورة على مرورك العطر عزيزتي ام اسامة

في راي ان كل من يخطا فهو مذنب اما الرجال صدقيني كلهم تفكير واحد ولا يحبون الزوجة العاملة هذا من فترة ليست بعيدة ولكن العكس في الوقت الحالي الرجل يريد ان يتزوج بالمدرسة او الطبيبة او المهندسة لا لشئ الا لتساعده في مصروف الدار وعيشة الرفاهية لان متطلبات العصر الحالي كثيرة وغالية وطلبات الزواج في الجرائد والانترنت تؤكد ذلك
شكرا لطرحك عزيزتي

مشكورة على المداخلة عزيزتي سعاد وعندك الحق اغلبية الرجال لي يخلو نساهم يخدمو ختى يعاونوهم في المصاريف هدا ماكان

شكرا على المرور العطر